ရှေးခေတ်ပညာရေးအကြောင်း
။
ကမ္ဘာ့ဘယ်နိုင်ငံမဆို ရှေးအတိတ် ပညာလက်ဆင့်ကမ်းဆောင်ယူမူက ဘာသာရေးအသိုင်းအဝိုင်းက စတင်ပုံရတယ်
______________________
မြန်မာပြည်အလယ်ပိုင်းကို ထေရဝါဒသာသနာမထွန်းကားခင်ကတည်းက မဟာယာနတို့ ရောက်ရှိခဲ့ပုံပဲ
ဘာကြောင့်လဲဆိုတော့ ပုဂံခေတ်မှာ အရည်ကြီးသာသနာဆိုတာက သူတို့ရဲ့ပြုမူနေထိုင်ပုံက မဟာယာနတို့ရဲ့ သဘောသဘာဝနဲ့အတော်နီးစပ်တာကိုး
သူတို့က ခရစ်ယာန်တို့ရဲ့ကျောင်းတော်သဘော
ကိုယ်ပိုင်နယ်မြေ
ကိုယ်ပိုင်ဝင်ငွေ
ကိုယ်ပိုင်အုပ်ချုပ်မှုနဲ့
ကိုယ်ပိုင်လက်နက်ကိုင်တပ်ဖွဲ့တွေရှိခဲ့ကြပုံပဲ
ပြီးတော့ သက်မွေးပညာရပ်တွေနဲ့ တိုက်ခိုက်ရေးပညာရပ်တွေကိုပါ သင်ကြားပေးကြတာမို့ ကျောင်းတော်တို့က မကျယ်ပြန့်သည့်တိုင်စေ ကိုယ်စီအခြေစိုက်ရာဒေသမှာ အတော့်ကိုတန်ခိုးထွားကြပုံလည်းရတယ်
ဒီတော့ ဘုရင့်အာဏာက တိုင်းပြည်အပေါ်ရာနှုန်းပြည့်မလွှမ်းမိုးနိုင်ဘဲ တခုခုဆိုရင် သူတို့နဲ့ညှိရနှိုင်းရတိုင်ပင်ရနဲ့ သဘောမညီရင် ဖီဆန်ချင်တဲ့သဘောတွေကြုံလာရတော့ စင်ပြိုင်အာဏာစက်တခုလို့မြင်လာပြီးဘုရင်တွေက ဘာသာရေးကို နိုင်ငံရေးနဲ့ခွဲထုတ်ဖို့ ကြံစည်လိုကြပုံရတယ်
______________________
အနော်ရထာမင်းက ထေရဝါဒကို ရွေးချယ်လိုက်တာက ထေရဝါဒရဲ့ လောကီရေးနဲ့သိပ်မဆက်စပ်တဲ့ ကျင့်စဉ်တွေကလည်း အကြောင်းတရပ်ဖြစ်လောက်တယ်
ဘာသာရဲ့အနှစ်သာရကို အမှန်တကယ်သဘောကျသွားလို့လည်း ဖြစ်ကောင်းဖြစ်နိုင်ပါတယ်
ဒီမှာ အနော်ရထာရဲ့ ဘာသာရေးအပြောင်းအလဲက အတော့်ကိုညင်သာခဲ့တယ်လို့ဆိုနိုင်တယ်
အရည်ကြီးတွေကို ပထမ ထေရဝါဒအယူယူလို့ ဓမ္မရေးရာမှာပဲ ပျော်မွေ့စေဖို့ အခွင့်အရေးပေးတယ်
ဒီလိုမှမနေနိုင်လဲ လူဝတ်လဲလို့ မင်းမှုထမ်းရာထူးပေးတယ်
ဒီကမ်းလှမ်းမှုတွေကို ခါးခါးသီးသီးငြင်းဆန်မယ်ဆိုရင်တော့ ပြည်နှင်ဒါဏ်ပေါ့
ဘာသာရေးနဲ့ အာဏာစိုးပိုင်သူတို့ရဲ့ ပါဝါပြိုင်မှု ပွတ်တိုက်မှုက ကမ္ဘာမှာ အတော့်ကို သွေးထွက်သံယိုများခဲ့တာနဲ့စာရင် အနော်ရထာဘုရင်ရဲ့လမ်းစဉ်က အတော့်ကိုစနစ်ကျပြီး ညင်သာတဲ့အပြောင်းအလဲလို့ဆိုရမှာပေါ့
ဒါပဲဖြစ်ရမယ်ဆိုတာထက် တန်ပြန်အခွင့်အရေးတွေနဲ့ ရွေးချယ်ခွင့်အရင်ပေးတာကိုး
ထားတော့
______________________
ဒီလို ထေရဝါဒကို နိုင်ငံတော်ဘာသာအဖြစ် သတ်မှတ်ပြီးချိန်မှာ ထေရဝါဒကျောင်းတော်တွေက လက်ရုံးရည်ထက် နှလုံးရည်ဆိုင်ရာကို ပိုပြီးသင်ကြားပေးကြတယ်
ဘုရင်ကစလို့ အုပ်စိုးသူအသိုင်းအဝိုင်း မည်သူမဆို ဘုန်းကြီးကျောင်းသင်ပညာရေးကနေ မွေးထုတ်လာခဲ့သူတွေချည်းမို့ ကျောင်းတော်တို့က ကိုယ်ပိုင်လက်နက်ကိုင်တပ်ဖွဲ့မရှိသည့်တိုင်စေ အာဏာစက်တော့ရှိနေစဲပေါ့
ကြားထဲက ကိုယ့်တပည့်က ဘုရင်ဖြစ်ရင် မင်းဆရာအဖြစ်ငြိမ့်မလား လူထွက်လို့ အကြီးတန်းရာထူးရယူလို့ လောကီစည်းစိမ်ခံစားမလား ကြိုက်ရရွေးဆိုသလို ဖြစ်နိုင်တာကိုး
မှူးကြီးမတ်ကြီးမွေးနိုင်ရင်လည်း ဆွမ်းကွမ်းမျှတ လာဘ်လာဘမပူရဘူးပေါ့
ဒါကြောင့်ပဲ ကျောင်းတော်တွေက အရည်အချင်းရှိသူတွေကိုရှာဖွေလို့ ကိုယ့်ကျောင်းကိုယ်စားပြုစေလိုကြတယ်
စကောလားရှစ်ပေးတယ်ပေါ့
______________________
ဒီလို ထူးချွန်သူတွေကိုမွေးထုတ်လို့ အာဏာစက်မှာသက်ရောက်မှုအားကြီးဖို့ လာဘ်လာဘပေါများဖို့ကြိုးစားရင်းဖြစ်ခဲ့ကြတဲ့ ကုန်းဘောင်ခေတ်နှောင်းပိုင်းက ပြဿနာတခုမှတ်တမ်းရှိတယ်
မိဖုရားကြီးကိုးကွယ်တဲ့ကျောင်းက အိမ်ရှေ့စံမင်းသားကိုးကွယ်တဲ့ကျောင်းရဲ့ ကျောင်းသားတယောက်ကို သူတို့ကျောင်းကိုယ်စားပြုဖြေဖို့ ဆွယ်ရာက ဖြစ်ကြတာ
မိဖုရားနဲ့ အိမ်ရှေ့စံတို့နဲ့ပတ်သက်တာမို့ ဘယ်သူမှမဖြေရှင်းရဲဘဲ ခေါင်းကိုက်နေရာက နောက်ဆုံး မောင်းထောင်ဆရာတော်ကဖြေရှင်းပေးမှ ပြေလည်သွားတယ်
______________________
ဒီလို ဗမာတို့ရဲ့ပညာရေးကို ဘုန်းတော်ကြီးကျောင်းတွေက အစဉ်အဆက်တာဝန်ယူလာတာက ကုန်းဘောင်ခေတ်ကုန်လို့ ကိုလိုနီခေတ်နှောင်းပိုင်းအထိပါပဲ
______________________
ကိုလိုနီခေတ်မှာတော့ အနောက်တိုင်းပညာရေးစနစ်သွပ်သွင်းလာတယ် ပညာရေးနည်းလမ်းစနစ်သစ်တခု သူတို့သယ်ယူလာတယ်ပေါ့
ဒါကပြဿနာမဟုတ်ပါဘူး
သူလည်းသူ့နည်းသူ့ဟန် ကိုယ့်လည်းကိုယ့်နည်းကိုယ့်ဖာသာဆိုရင်ပေါ့
ပြဿနာဖြစ်လာတာက ဘုန်းတော်ကြီးကျောင်းထွက်တွေဟာ ယခင်လို ထူးချွန်လို့လည်း အုပ်စိုးသူအသိုင်းအဝိုင်းမှာ နေရာပေးခြင်းမခံရတော့တာပဲ
ပိုဆိုးတာက နှိမ်လာတာပဲ
ဘုန်းကြီးကျောင်းသားဆိုရင် သိမ်ငယ်သလိုလို ရှက်စရာလိုလိုအတွေးမျိုး လူထုကြားစိမ့်ဝင်လာအောင်လုပ်ဆောင်ခဲ့တာပဲ
ဘုန်းကြီးကျောင်းသား အဟောင်းစား
ကောလိပ်ကျောင်းသား အကောင်းစား
ABCD ,မတတ်ဘဲနဲ့အရပ်ထဲကိုဝင် စသည်ဖြင့်ပေါ့
______________________
ဒီနည်းနဲ့ ဗမာ့ပညာရေးရဲ့အသက်ဖြစ်တဲ့ ဘုန်းကြီးကျောင်းသင်ပညာရေး ကွယ်ပျောက်သွားအောင် လူထုအကြားဘုန်းကြီးတို့ရဲ့ ဩဇာသက်ရောက်မှုကို လျှော့ချဖို့ အင်္ဂလိပ်တို့က ဗျူဟာကျကျ တိုက်ပွဲဆင်နွှဲလာတယ်
ဒီလို ဘုန်းကြီးကျောင်းသင်ပညာရေးကို အရေးမပါသလို လှောင်ပြောင်နှိမ့်ချပေမယ့် သူတို့သွင်းယူလာတဲ့ သူတို့ပညာရေးကိုကျပြန်တော့လည်း လူတိုင်းမသင်ယူနိုင်အောင် မြှင့်ထားတော့
သာမန်ပြည်သားတို့မှာ ဘုန်းကြီးကျောင်းသင်ပညာရေးဆုံးလို့လည်း ဘာအရာထူးအရာခံမှမဖြစ်နိုင်
သူတို့ကျောင်းကြပြန်တော့လည်းမတက်နိုင်ဆိုတော့
ပညာသင်ရခြင်းက အချည်းနှီးအချိန်ဖြုန်းမှုအဖြစ်မြင်လာပြီး သေစာရှင်စာသိရုံ အရေးအဖတ်လောက်ပဲသင်ယူလာကြတယ်
ဒီလိုနဲ့ ခွဲခြမ်းစိတ်ဖြာလေ့ကျက်မှုပိုင်းမှာ အားနည်းလာကာ တွေးဆမျှော်ခေါ် ထောက်ချင့်သုံးသပ်တဲ့ ပညာရေးအတွက် အချိန်မပေးတော့ပဲ မပေးနိုင်ဘဲ ကျွန်သက်ရှည်ရပြန်တာပေါ့
______________________
ဒါက ကျွန်သက်ရှည်ဖို့ ပညာရေးထိမ်းချုပ်မှုတင်မကဘဲ လူထုအကြားသက်ရောက်မှုကြီးမားတဲ့ ဘာသာရေးပုဂ္ဂိုလ်တို့ရဲ့ပါဝါကိုလျှော့ချလိုက်တာလို့လည်းဆိုနိုင်တယ်
ဒါမှ သူတို့ဘာသာကို ယူဆောင်သွပ်သွင်းလို့ရမှာကိုး
______________________
ပြီးတော့ ဘုန်းတော်ကြီးတို့အနေနဲ့လည်း ယခင်လို တရပ်တရွာလုံးရဲ့ ပညာရေးကိုတာဝန်ယူရတာမျိုးမရှိတော့ အားလပ်လာတော့ ပျင်းရိခြင်းနဲ့အတူ မတော်တရော်စိတ်တွေ တွေးကြံလို့ အကျင့်သီလပိုင်းမှာ အားနည်းလာလို့ ဆုတ်ယုတ်စရာဖြစ်လာစေနိုင်သလို
အရေးပါမှုလျော့ကျလာတာမို့
လူထုကြားအာဏာစက်ကလျှော့လာ
ဒီတော့ လူထုအကြိုက် လိုက်လိုက်လျှောလျှော လိုက်ပါနေထိုင်ပြောဟောရင်းက အနှစ်သာရဓမ္မတို့ဖက်မလှည့်နိုင်
ဟောပြောပြန်တော့လည်း
လူထုကဘာသာရေးနဲ့ဝေးတော့နားမလည်
ဒီတော့အများနားလည်သဘောကျရာ ဒါနကထာ သီလကထာရဲ့ အံ့ဖွယ်အကျိုးရလဒ်နဲ့ ပြစ်ဒါဏ်ခံစားရမှုတွေကို ဖွဲ့ကာနွဲ့ကာဟောပြောရင်း အနှစ်အသားပြောက်
______________________
အတွင်းပုတ်လို့ သူ့ဖာသာကြွေသွားတဲ့သဘောပေါ့
______________________
ဒီလို ကိုလိုနီနယ်ချဲ့တို့ရဲ့ရည်ရွယ်ချက်ကို သိမြင်လာလို့ ပထမကျောင်းသားသပိတ်ဖြစ်ပေါ်လာရာက အမျိုးသားကျောင်းတွေ တဖန်အားကောင်းလာခဲ့တယ်
ဒီကနေမှ သူ့ကျွန်ဘဝလွတ်မြောက်ဖို့ အမျိုးသားရေးစိတ် သခင်စိတ်သွင်းပေးနိုင်ခဲ့တယ် ဒီလိုနဲ့လွတ်လပ်ရေးရခဲ့တယ်ပေါ့
______________________
ဒါပေမယ့် ကိုလိုနီနယ်ချဲ့တို့ရဲ့ စနစ်တကျဖျက်စီးမှုကြောင့် ဘုန်းကြီးကျောင်းသင်ပညာရေးက လုံးဝလန်ထူမလာတော့ဘဲ ကျွန်တော်တို့ငယ်ငယ်ကအထိ ဘုန်းကြီးကျောင်းသားဆိုရင် နိမ့်ကျသလိုလိုကြီး ထင်မှတ်နေနေကြတုန်းကိုး
ဒါက အင်္ဂလိပ်တို့ဖျက်စီးလို့ ပုတ်ဆွေးပျက်စီးသွားတဲ့ ဗမာ့ပညာရေးစနစ်ရဲ့ ပုံရိပ်တွေပေါ့
တနည်းအားဖြင့် ကိုယ်တွေကိုယ်တိုင်က ပြန်လည်ရှင်သန်အောင် ပြုပြင်ထိမ်းသိမ်းဖို့ပျက်ကွက်ခြင်းရဲ့ပြယုဒ်ဆိုရင်လည်း မမှားဘူးပေါ့လေ
(ခေတ်ပြောင်းသွားတာလဲပါတာပေါ့လေ)
ဘာကြောင့်လဲဆိုတော့ ကိုလိုနီဘဝကလွတ်တာ နှစ်ပေါင်း ၇၀ ကျော်လာပြီးပဲဟာ ခုထိ သူတို့ဖျက်စီးထားခဲ့တဲ့အတိုင်း အရာမယွင်း ရှိနေသလိုကြီးကိုး
______________________
______________________
ဒါကတော့ဆရာကြီးပါမောက္ခဦးချမ်းမြ (မြကေတု) ရဲ့ မြန်မာထုံးတမ်းဓလေ့ယဉ်ကျေးမှုဆောင်းပါးတွေကနေ အတွေးဆန့်ကြည့်တဲ့သဘောပါ
အဆိုပါဆောင်းပါးတွေကို ဒို့အညာယူကျုချန်နယ်မှာ ကိုဝင်းဦး ဖတ်ပြထားတာရှိတယ်ဗျ
အဲ့သည်မှာသွားရောက်နားဆင်လို့ တော်လှန်ရေးအတွက် တတပ်တအားပါဝင်နိုင်ပါတယ် လူကြီးမင်းတို့ရဲ့အားထုတ်မှု အဟောသိကံမဖြစ်ဖို့ VPN ခံဖို့လည်း မမေ့နဲ့အုံးဗျနော
။
။
#အရေးတော်ပုံအောင်တော့မည်
#စစ်အာဏာရှင်မုချအဆုံးသတ်တော့မည်
။
ကိုလေး ☆ အင်းတဲ
