မျက်မှန်ပါဝါကို လေဆာနှင့် ပြုပြင်မည့်သူများ သိသင့်သည့် အချက်များ
BY: GOOD HEALTH
မျက်မှန် ပါဝါများသူ၊ အကြောင်းကြောင်းကြောင့် မျက်မှန် မတပ်ဆင်လိုသူ ဒါမှမဟုတ် မကြာခဏ မျက်မှန်ကို မေ့တတ်လေ့ရှိသူ၊ ဒါမှမဟုတ် မျက်ကပ်မှန် တပ်ရတာကို အလုပ်ရှုပ်တယ်လို့ ထင်နေကြသူတွေ အတွက် မျက်လုံးကို လေဆာနဲ့ ပြုပြင်နိုင်တဲ့ ခွဲစိတ် နည်းလမ်းတွေ ပေါ်ပေါက်နေပါပြီ။ လေဆာနဲ့ ခွဲစိတ်ကုသတာဟာ အောင်မြင်နှုန်းများပြီး ဆိုးကျိုးလည်း ပြောပလောက်အောင် မရှိတာမို့ အလွန် ခေတ်စားတယ်လို့ သိရပါတယ်။ ဒါကြောင့် မျက်စိကို လေဆာနဲ့ ပြုပြင်လိုသူတွေ သိလိုကြတဲ့ မေးခွန်း ခြောက်ခုနဲ့ အဖြေတွေကို ဖော်ပြပေးလိုက်ပါတယ်။
၁။ ဘယ်လိုလူတွေကို လေဆာနဲ့ ပြုပြင်ပေးလို့ ရပါသလဲ
မျက်စိ အဝေးမှုန်၊ အနီးမှုန်နဲ့ မျက်စိဆုံချက် မညီတဲ့ ဒီဂရီ အမျိုးမျိုး ရှိသူတွေ အတွက် လေဆာနဲ့ ပြုပြင်ပေးလို့ ရပါတယ်။ အသက် ၁၈ နှစ်အောက် အရွယ်တွေမှာ သူတို့ရဲ့ မျက်လုံးဟာ ကြီးထွားဆဲ ဖြစ်နေပြီး အဝေးမှုန်တဲ့ ဒီဂရီဟာ ဆိုးလာနိုင်သေးတဲ့ အတွက် ပါဝါ တည်ငြိမ်တဲ့ အချိန်ရောက်မှသာ လေဆာနဲ့ ပြုပြင်ပေးလေ့ ရှိပါတယ်။ ခြုံပြောရမယ်ဆိုရင် လေဆာနဲ့ ခွဲစိတ်မှု မပြုလုပ်မီ အနည်းဆုံး တစ်နှစ်ခန့်ဟာ မျက်မှန်ပါဝါ ပြောင်းလဲမှု အနည်းငယ်သာ ရှိသင့်ပါတယ်။ လေဆာနဲ့ ခွဲစိတ်ခံရမယ့်သူရဲ့ မျက်ကြည်လွှာဟာလည်း လုံလောက်တဲ့ အထူ အနေအထား ရှိရပါမယ်။ အာရှတိုက်သားတွေရဲ့ မျက်ကြည်လွှာ အထူဟာ ပျမ်းမျှ ၅၅ဝ မိုက်ခရိုမီတာ ရှိပါတယ်။ လေဆာနဲ့ ခွဲစိတ်ခံရမယ့်သူရဲ့ မျက်ကြည်လွှာ အထူဟာ ၄၈၀ မိုက်ခရိုမီတာထက် များရပါမယ်။
၂။ ဘယ်လိုလူတွေဟာ လေဆာနဲ့ ခွဲစိတ်ဖို့ မသင့်တော်သူတွေလဲ
(က) ကိုယ်ဝန်ဆောင်သူများ
ကိုယ်ဝန်ဆောင် ကာလမှာ မျက်မှန်ပါဝါ အပြောင်းအလဲ ရှိတတ်ပါတယ်။ ကိုယ်ဝန် တတိယ အဆင့်မှာ မျက်ကြည်လွှာ ရောင်ရမ်းတတ်တာမို့ ကိုယ်ဝန်ဆောင်ချိန်မှာ မျက်လုံးကို လေဆာနဲ့ ပြုပြင်လို့ မရပါဘူး။
(ခ) ဆီးချိုရောဂါ
သင့်မှာ ဆီးချိုရောဂါ ရှိနေရင် မျက်လုံးကို လေဆာနဲ့ ပြုပြင်တာကြောင့် မျက်စိ ခြောက်သွေ့တာ၊ အတွင်းတိမ်နဲ့ ရေတိမ်လိုမျိုး တခြား မျက်စိဝေဒနာတွေ ခံစားရနိုင်ပါတယ်။ လေဆာနဲ့ ပြုပြင်ပြီးရင် မျက်စိ ခြောက်သွေ့တာ သက်သာအောင် မျက်ရည်တု (Lubricants) တွေ ပိုမို အသုံးပြုရတတ်ပါတယ်။
(ဂ) ရူမရွိုက် ရိုးဆစ် ရောင်ရမ်းနာ (Rheumatoid Arthritis)
ရောင်ရမ်းတတ်တဲ့ သဘာဝရှိတဲ့ ရောဂါကြောင့် မျက်ကြည်လွှာ ပုံသဏ္ဌာန် ပြောင်းလဲနိုင်ပြီး လေဆာနဲ့ ပြုပြင်ထားတဲ့ အမြင် တိကျမှုကို ထိခိုက်နိုင်ပါတယ်။
(ဃ) Keratoconus
မျက်ကြည်လွှာ အားနည်းတဲ့ ရောဂါပါ။ လေဆာကြောင့် မျက်ကြည်လွှာ ပိုမို ပါးသွားနိုင်ပြီး ပိုမို အားနည်းသွားကာ မျက်ကြည်လွှာ စူထွက်လာတာနဲ့ ယိုင်တာတွေ ဖြစ်တတ်ပြီး အမြင်အာရုံ ဆုတ်ယုတ်သွားနိုင်ပါတယ်။
၃။ မိမိကို ခွဲစိတ်ပေးမယ့် ဆရာဝန်ကို ဘာမေးခွန်း မေးသင့်ပါသလဲ
(က) မိမိရဲ့ မျက်စိ ကျန်းမာရေး ကောင်း၊ မကောင်း
(ခ) အောင်မြင်မှုနှုန်း ဘယ်လောက် ရှိသလဲ
(ဂ) ခွဲစိတ်ပြီးပါက ရလဒ်ကောင်း ရရှိနိုင်ခြေ ဘယ်နှရာခိုင်နှုန်းခန့် ရှိပါသလဲ။
၄။ လေဆာနဲ့ ခွဲစိတ်ပြုပြင်မှု မလုပ်ခင် ဘာစစ်ဆေးမှုတွေ ပြုလုပ်ဖို့ လိုအပ်ပါသလဲ
(က) Snellen Chart ကို အသုံးပြုပြီး အမြင် တိကျမှုကို တိုင်းတာရပါတယ်။
(ခ) မျက်မှန်ပါဝါကို တိုင်းပါမယ်။ မိမိ အသုံးပြုနေတဲ့ မျက်မှန် ဒါမှမဟုတ် မျက်ကပ်မှန်ရဲ့ ပါဝါကို တိုင်းပါမယ်။
(ဂ) မျက်ကြည်လွှာ၊ မျက်ခွံ၊ မျက်မြှေး၊ မျက်စိမှန် ဘီလူးကို အသေးစိတ် စစ်ဆေးပါမယ်။
(ဃ) မျက်စိ အတွင်းဖိအား ဘယ်လောက် ရှိသလဲလို့ Tonometry နဲ့ တိုင်းတာပါမယ်။ ရေတိမ် ရှိ၊ မရှိကို အသေးစိတ် စစ်ဆေးတာပါ။
(င) မျက်စိ အတွင်းတိမ် ရှိမရှိနဲ့ တခြား မျက်စိရောဂါ ရှိမရှိကိုပါ မျက်လုံးသူငယ်အိမ် ချဲ့ပြီး အနုစိတ် စစ်ဆေးပေးပါတယ်။
(ဆ) မျက်ကြည်လွှာအထူ ဘယ်လောက် ရှိသလဲ တိုင်းတာပါမယ်။
(ဇ) မျက်စိသူငယ်အိမ် အရွယ်အစားကို တိုင်းတာပါမယ်။
၅။ လေဆာနဲ့ ပြုပြင်ပြီးရင် ဘယ်လောက်ထိ ကောင်းမယ်လို့ မျှော်မှန်းနိုင်ပါသလဲ
လေဆာနဲ့ ပြုပြင်တာဟာ မျက်မှန်နဲ့ မျက်ကပ်မှန် အားကိုးရတာ သက်သာအောင်လို့ပါ။ အဝေးမှုန် ဒီဂရီနဲ့ မျက်စိဆုံချက်အမှတ် မညီတာ များလွန်းသူတွေ အတွက် လေဆာနဲ့ ပြုပြင်ပြီး နောက်ပိုင်းမှာ အဝေးမှုန်ပါဝါ အနည်းငယ်လောက်ပဲ ပြန်ဖြစ်နိုင်ပါတယ်။ လေဆာနဲ့ ပြုပြင်ထားသူတွေဟာ မျက်စိကို ဂရုစိုက်တဲ့အကျင့် ပြုလုပ်ဖို့ လိုအပ်ပါတယ်။
၆။ လေဆာနဲ့ ပြုပြင်ပြီး မျက်စိကို ဘယ်လို ဂရုစိုက်မှု ပြုလုပ်ရပါမလဲ
မျက်စိကို လေဆာနဲ့ ခွဲစိတ်ပြုပြင်ပြီးရင် ဆရာဝန်နဲ့ တစ်ရက်၊ တစ်ပတ်၊ တစ်လ၊ သုံးလ၊ ခြောက်လနဲ့ တစ်နှစ်အတွင်း ပြန်လည် ပြသကြပါတယ်။ မျက်လုံးကို မတော်တဆ ထိခိုက်နိုင်တဲ့ အားကစားနည်း (ဥပမာ - လက်ဝှေ့ထိုးတာ) တွေကို အနည်းဆုံး ခြောက်လ မကစားရပါ။ မျက်လုံးကို ပွတ်တာတွေလည်း မပြုလုပ်ရပါ။ ခွဲစိတ်တာကြောင့် ဖြစ်ပေါ်တတ်တဲ့ မျက်စိ ခြောက်သွေ့မှုကို သက်သာအောင် မျက်ရည်တု မျက်စဉ်းဆေး ခတ်ပေးပါ။ ခွဲစိတ်ပြီးလို့ လှပချင်တဲ့ အကြောင်းကြောင့် ဒါမှမဟုတ် ပါဝါ မကိုက်သေးတာကြောင့် မျက်ကပ်မှန် တပ်ဆင်လိုတယ်ဆိုရင် အနည်းဆုံး ခွဲပြီး တစ်လအကြာမှ တပ်ဆင်ရပါမယ်။
ဒေါက်တာခင်မိုးမိုး
