ဒိဋ္ဌိ

 ဒိဋ္ဌိ

.

ဒီစာလုံးမြင်လိုက်ရင် ဒီအသံလေးကြားလိုက်ရင်ဘဲ 

အယူမှားသလိုလို မကောင်းသလိုလို စိတ်ထဲမှာချက်ခြင်းတွေးမိလိမ့်မယ်ထင်တယ်

ပထမဆုံးအနေနဲ့ ဒီစာလုံးလေးကို ဘာကြောင့် ဒိတ်ထိ' လို့သံထွက်လဲရှင်းပါရစေ

ဒိ နဲ့ နောက်က င အောက်က ခြေထောက်လေးကမဆက်ဘဲ လည်ပင်းလေးပါနေတာ

သတိပြုမိမယ်ထင်တယ် 

အဲ့ဒါလေးက ဋ နဲ့ ဌ နှစ်လုံးဆင့်ထားတဲ့သဘောပါ

(ဒိဋ် ဌိ= ဒိတ်ထိ)

ဒီအတိုင်း လက်နဲ့ဘောပင်ကိုင်ရေးရင် မခက်လှပေမယ့် ဖုန်းနဲ့ရေးရင် နည်းနည်းကသီလိမ့်မယ် 

ဒါပေမယ့် ဘာနဲ့ဘာပေါင်းထားလဲဆိုတာတော့ ရှင်းရှင်းလင်းလင်းသိသွားပါလိမ့်မယ်

ဋ ရေး ပြီးတော့ ္ ကလေးနှိပ် ပြီးတော့ ဌ ရေးမှ ဒီပုံသဏ္ဍန်လေးရေးလို့ရမှာပါ

ထားပါတော့

ဒီအသံထွက်အတိုင်း ရေးနည်းနှစ်နည်းရှိတယ်ဗျ 

နှစ်ခုစလုံးကလည်း အသုံးတွင်နေတာတွေ့ရတယ် တိတ္ထိ' ဆိုတဲ့ အရေးအသားပါ

မြန်မာအဘိဓါန်မှာတော့ ဒိဋ္ဌိ' ဆိုတဲ့ဒီအသုံးကို ပါဠိပါကနေ တိုက်ရိုက်မွေးစားထားတာလို့ဆိုတယ်

တိတ္ထိ' ဆိုတဲ့အအသုံးကိုတော့ ပါဠိ တိတ္ထိယ ကနေ ဆင့်ကဲမွေးယူထားတာပါတဲ့

အနက်အားဖြင့်

-------------------------

ဒိဋ္ဌိ 

..

၁။ အမြင် ၊ အယူအဆ

၂ ။ မှားသောအယူအဆကို ယူသောသူ

တိတ္ထိ  

.

အယူမှားသောသူ

--------------------------

မြန်မာအဘိဓါန်အဖွင့်အရ ဘုံအားဖြင့် အယူမှားတယ်ဆိုတဲ့ အဆိုတူညီပေမယ့်

ဒိဋ္ဌိ'အသုံးမှာ ကောင်းတယ်မကောင်းဘူးတိုက်ရိုက်မဆိုတဲ့ 

နောက်ဖွင့်ဆိုချက်တခုပါနေတာတွေ့ရတယ်

--------------------------

ပါဠိမှာတော့ အမြင် ၊ အယူအဆ လို့ဘဲ ဖွင့်ဆိုဟန်ရှိရဲ့

ဘာကြောင့်လဲဆိုတော့ သူကို မကောင်းတာကောင်းတာညွှန်းဆိုဖို့ဆိုရင်  

နောက်ထပ်တွဲဆက်ရတဲ့ ဝေါဟာရတွေရှိတာမို့ပါ

ဥပမာ

မိစ္ဆာ ဆိုတာနဲ့ပေါင်းလို့ မိစ္ဆာဒိဋ္ဌိ'ဆိုရင် အယူမှားသူ

သမ္မာ ဆိုတာနဲ့ပေါင်းလို့ သမ္မာဒိဋ္ဌိ'ဆိုရင် မှန်ကန်သောအယူရှိသူ 

-------------------------

ဒီတော့ ဒိဋ္ဌိ' ဆိုတာကို ပါဠိအရ အတွေး ၊ အမြင်လို့ဘဲ 

ရိုးရိုးလေးဖွင့်တာသင့်တော်မယ်ထင်ပါတယ်

ဗုဒ္ဓဘာသာစာပေတွေမှာ မြတ်ဗုဒ္ဓခေတ်က ဗုဒ္ဓနဲ့အပြိုင် ဒိဋ္ဌိဆရာကြီး ၆ ဦးရှိတယ်လို့ဆိုရာမှာ

ကိုယ်စီအယူအဆနဲ့ ဂိုဏ်းဂဏစုဖွဲ့လို့ သူ့အတွေးအမြင်ကို ယုံကြည်သက်ဝင်သူများစွာရှိတဲ့ 

အတွေးအခေါ်ဆရာကြီး (ဘာသာရေးဆရာကြီး) ၆ ဦးလို့ ဖွင့်ရမယ်ထင်တယ် 

ဗုဒ္ဓအပါဝင်ဆိုရင် ၇ ဦးပေါ့

မိစ္ဆာဒိဋ္ဌိဆရာကြီးလို့ နှိမ်နှိမ်ချချ ပုတ်ပုတ်ခတ်ခတ်ဖွင့်ဆိုထားတာမျိုးမဟုတ်ဘူးဗျ 

.

#အရေးတော်ပုံအောင်တော့မည်

#စစ်အာဏာရှင်မုချအဆုံးသတ်တော့မည်

.

သန်းထွန်းလေး ☆ အင်းတဲရွာ