ထန်းရည်ချို နဲ့ ထန်းရည်ခါး အကြောင်း
_________________________________________
🌴 ထန်းရာသီ
_________________________________________
ထန်းရာသီ သုံးမျိုးရှိတယ်
။
ထန်းဖိုကို ပြာသိုလ၊ တပို့တွဲလ မှာစတက်တယ်
ထန်းမကို တန်ခူးလမှာ စတက်တယ်
သီးယဉ်ကိုတော့ ကဆုန်လ နောက်ပိုင်းမှ ဝါဆိုလကုန်အထိ တက်ကြတယ်လို့ ဆိုပါတယ်
။
ထန်းဟာ စတင်လိုက်ချိန်ကတည်းက နေပူပူမိုးရွာရွာ တရက်မပျက်တက်နိုင်မှ အထွက်ကောင်းနိုင်တာမျိုးမို့ ဖျားလည်းနားရပေါင်ဗျာလို့ ထန်းတောင်သူတို့ဆိုကြတယ်
_________________________________________
🌬️ ထန်းပင် အမျိုးအစား
_________________________________________
ထန်းဟာ ထန်းဖိုနဲ့ ထန်းမဆိုပြီး အပင်နှစ်မျိုးရှိတယ်
အဖိုက ထန်းနို့ချောင်းထွက်တဲ့အပင်ဖြစ်ပြီး
ထန်းသီးသီးတာကတော့ ထန်းမပင်ပါ
ဒီလိုအဖိုအမကွဲပေမယ့် နှစ်ပင်လုံးက
ထန်းရည်ချိုသာထွက်ပါတယ်
_________________________________________
🥛 အခါးဖြစ်ဖို့
_________________________________________
ဒါဆိုရင် အချိုပင်အခါးပင်ရယ်လို့ သီးခြားမရှိပါဘဲနဲ့ ထန်းရည်အခါးက ဘယ်လိုဖြစ်လာတာလဲ
ဆေးခပ်တာ တမင်ပြုပြင်ရတာလို့လည်း မထင်လိုက်ပါနဲ့ဦး
။
သဘာဝကြောင့်လိုပဲဆိုပါရစေတော့
မွန်းလွဲသွားတာနဲ့ မူလအချိုကနေ အလိုလိုကိုခါးသွားတာ ဘာမှလုပ်စရာကိုမလိုဘူး
။
အဲ့ဒါကြောင့်ဘဲ ထန်းလျက်ချက်သူတွေရဲ့လုပ်ငန်းခွင်က အခါးသို့ပြောင်းမသွားခင်လေး မနက်ပိုင်းမှာအပြီးလုပ်ကြရတာ
ထန်းလျက်ကထန်းရည်အချိုကိုချက်ရတာကိုး
။
ဒါဆိုရင် မနက်ပိုင်းမှာ ထန်းရေခါးသောက်ကြသူတွေတွေ့ဖူးတယ် သူတို့ဘယ်ကရလဲမေးစရာရှိတယ်
အရင်နေ့ကအကျန်တွေလားပေါ့
။
ဒီလိုဗျ အရင်နေ့က အခါးဖြစ်သွားတဲ့အရည်အနည်းငယ်ကို ခုထန်းလှီးလို့ခံမယ့်မြည်အိုးမှာ ထည့်ခံထားလိုက်ရင် အသစ်ကျလာတဲ့ထန်းရည်ကပါ အလိုလိုခါးသွားတာ
_________________________________________
🥣 ဟင်းတမယ်
_________________________________________
အဲ့ဒီထန်းရည်အခါးအနည်က ဂွေးတောက်လေး ပုဇွန်ခြောက်လေးနဲ့ ရေလေးစွက်လို့ဟင်းခါးချက်သောက်လို့လည်းရတယ်
။
ရေစွက်လားတာမို့ မမူးပါဘူး
ခါးသက်သက်လေးနဲ့ အရသာတမျိုး
_________________________________________
🧑⚕️ ဆရာဝန်ထက်ပို
_________________________________________
ထန်းရည်ရဲ့ကောင်းကျိုးက အခြားတမင်စီမံထားတဲ့ အဖျော်ယမကာတွေနဲ့မတူဘူး ကျောက်ကပ်ဘာညာထိဖို့ဝေးစွ ဆေးသလိုတောင်ဖြစ်လို့ ကျောက်ရှိရင်လည်း ကျေစေသတဲ့
ပြီးတော့ သောက်သမျှပြန်ပေါက်တာမို့ ဆီးနဲ့ဝမ်းရောဂါတွေအတွက်က ဆရာဝန်ထက်တောင် စိတ်ချရတယ် ခေါင်းခဲစရာကိုမရှိတာရယ်
_________________________________________
😵💫 မူးပုံမတူ
_________________________________________
ထန်းရည်မူးနဲ့အရက်မူးသူက ဟန်ပန်မတူဘူးလို့လည်းဆိုကြတယ် ကြည့်တာနဲ့သိနိုင်တယ်တဲ့
။
အရက်မူးသူက ငိုက်စိုက်ငိုက်စိုက်နဲ့တဲ့
ထန်းရည်ကတော့သူနဲ့ဆန့်ကျင်စွာဘဲ သူလွန်လို့မူးရင် နောက်ကို လန်တန်လန်တန်နဲ့ဆိုပဲ
။
အံမယ် မုံရွာဦးလေးခန့် ရေးလို့ အရင်ကတော့ ရွှေမန်းတင်မောင်ကြီးဆိုခဲ့ပြီး နောက်ပိုင်း သုမောင်ကြီး ထပ်ဆင့်အရောင်တင်ထားတဲ့သီချင်းလေး တဟဲဟဲနဲ့ရယ်
။
ဘာတဲ့
ထန်း .. ပင်ကျရေ ထန်း .. ပင်ကျရေ ချိုတမျှမျှခါးသလေဗျ
😅
။
ထားတော့
_________________________________________
💪 အကျိုးပြုမှု
_________________________________________
ထန်းက တပင်လုံးပစ်စရာဘာမှမရှိပါဘူး
။
အပင်ပေါက်စလေးကအစ စားလို့ရတယ်
ထန်းမြစ်လို့ခေါ်တဲ့ဟာပါ
အမှန်တော့ အဲ့ဒါထန်းပင်ရဲ့အမြစ်မဟုတ်ဘူးဗျ ထန်းပင်ပေါက်ကလေးပါ
။
အရွယ်လေးတက်လာတော့ သူကထွက်လာတဲ့
သကျစ်ဖတ်က မီးမွှေးတဲ့နေရာသုံးတာ
ဒီအရွယ်က ပညာရှင်တို့ခွဲခြားပြထားတဲ့ ထန်းရဲ့အရွယ်ခြောက်ပါးထဲက သမီးလှဆိုတဲ့အရွယ်ထင်ပါရဲ့
။
ထန်းလက်ခုံက အမှိုက်ကြုံးနှောက်ချေးကြုံးရာမှာပေါ့
။
ပြီးတော့ထန်းလက်က အကျောလေးခွာပြီး
ချီဖို့တုတ်ဖို့လျှော်ရတယ်
ကစားစရာခြင်းလုံးထိုးလို့ရတယ်
အိမ်သုံးတောင်းတွေ ဖန်တီးလို့ရတယ်
။
ထန်းလက်ကလည်း ခြံဝန်းစည်းရိုးကန့်တယ်
ပြီးတော့ ထိုင်စရာ ထန်းဘလတ်ခုံလုပ်ကြတယ်
နောက် ကလေတွေမြင်းလုပ်စီးကြတာပေါ့
။
ထန်းရွက်ကြတော့အမိုးအကာ အေးမှအေးပေါ့
_________________________________________
💑 ထန်းရေးတဲ့ဖူးစာ
_________________________________________
ကိုယ်တွေရွာမှာထန်းနဲ့ပတ်သက်လို့ ဖူးစာရေးဇာတ်လမ်းလေးတပုဒ်လည်း ရှိတယ်
ကိုယ့်ဦးကြီးယောက်ပေါ့ မတက်တတ်တက်တတ် အတက်ကောင်းလို့ ပြုတ်ကျရာက သနားချစ်နဲ့မြဲခဲ့ဖူးတဲ့ တွဲလက်အကြောင်း
_________________________________________
🧝 ဝန်ကြီးပဒေသရာဇာ ရဲ့တျာချင်းလို
_________________________________________
ကဲဗျာ ထန်းရည်အကြောင်းပဲရေးဖို့ရည်ရွယ်ထားတာ များတောင်သွားပြီ
နောက်ဆုံးအနေနဲ့ ရွာရောက်တုန်းက အစ်ကိုရဲ့သူငယ်ချင်းထန်းတဲကိုသွားလည်ကြရင်း ညောင်ရမ်းခေတ်စာဆို ဝန်ကြီးပဒေသရာဇာ ရေးဖွဲ့ခဲ့တဲ့
နွေဦးကာလ၊ မြူထသောခါ
ရင်းထောင်ရင်းဆွဲ၊ ဆောင်မြဲအိုးလွယ်ကာ
ဆိုတဲ့ တျာချင်းကိုရွတ်လို့
ရင်းထောင်ဆိုတာဘာလဲ ရှင်းပြပါလားလို့မေးရာမှာ
သူနောက်ပြီးဖြေတာလေးနဲ့ အဆုံးသတ်ပါရစေ
ဟုတ်ပကွာ နွေဦးမြူထလို့ ထန်းတောင်သူများ
ထန်းလုပ်ငန်းစဖို့ကတယ်မလွယ်ဘူးကွ မြည်အိုးဖိုး ကြိုးဖိုးနဲ့ ဒီအရင်းထောင်နိုင်အောင်ပဲ အတော်ကြိုးစားရတာ
အဲ့ဒါရင်းထောင်ပေါ့ကွာတဲ့ 😄
_________________________________________
အသက်အပေါင်ထားနိုင်ပေမယ့် အထောက်အကူပစ္စည်းတွေအတွက် အမြဲခေါင်းခဲရတဲ့ မလွယ်လှတဲ့ ဘဝတွေပေါ့ဗျာ
_________________________________________
။
။
#အရေးတော်ပုံအောင်တော့မည်
#စစ်အာဏာရှင်မုချအဆုံးသတ်တော့မည်
။
သန်းထွန်းလေး ☆ အင်းတဲရွာ
No comments:
Post a Comment